ЕНТ-ға жаңа пән енгізілді

2021-2022 оқу жылында бейіндік пән "Физика" болып қала береді, өзгеріс жаңа оқу жылынан бастап енгізіледі

Келесі оқу жылынан бастап ІТ саласындағы мамандықтарды меңгергісі талапкерлер ЕНТ-да физика емес, информатика пәнінен тест тапсырады.

БҒМ баспасөз қызметі министрлікке жоғары оқу орындарында IT-бағыттар бойынша оқығысы келетін талапкерлер үшін ЕНТ-ның бейінді пәндер тізіміне "Информатика" пәнін енгізу жайлы көптеген өтініш келіп түсетінін атап өтті.

"Осыған байланысты министрлік талдау жүргізіп, 2022-2023 оқу жылынан бастап "Информатика мұғалімдерін даярлау", "Информациятық технологиялар" және "Информациятық қауіпсіздік" білім бағдарламалары топтарына түсетін оқушылар ЕНТ-да "Математика+Физика" орнына "Математика+Информатика" комбинациясын тапсырады деген шешім қабылдады", - деп мәлімдеді ведомство.

Айта кетері, 2021-2022 оқу жылында бейіндік пән "Физика" болып қала береді.

Бұл ретте пилот ретінде талапкерлердің таңдауы бойынша биыл (наурыздағы ЕНТ кезінде) ІТ-бағыттарға түсу үшін "Математика+Информатика" комбинациясын таңдау опциясы қосымша қолжетімді болады.